دليل سوق عالم السماعات: كل الخصائص وكيف تستخدمها

السلام عليكم ورحمة الله وبركاته
صبحكم / مساكم الله بالخير جميعا

سوق عالم السماعات
مكان لبيع وشراء السماعات والأجهزة الصوتية المستعملة بين الهواة في السعودية والخليج.
و نشر اعلانك فيه مجاني بشكل كامل .

سويت السوق لأن بيع أي شي يخص الصوتيات في السعودية والخليج متعب وصعب.
في القروبات يضيع الإعلان بين الرسائل، وفي المواقع العامة يضيع بين آلاف الإعلانات اللي ما لها علاقة بالصوتيات.
هنا كل زوار السوق مهتمين بالصوتيات بس،
ما يدخله إلا واحد يدري إنه بيلقى منتجات تخص مجال الأوديو.

وكل إعلان له صفحة ثابتة ورابط قصير، وكل بائع له صفحة فيها صفقاته وتقييماته.

في هذا المقال أشرح كل خصائص و مميزات السوق بالصور

خصائص السوق باختصار

اضغط على أي خاصية وتنزل لشرحها مباشرة.

↑ الفهرس

التسجيل وتفعيل الحساب

تقدر تتصفح السوق بدون حساب.
الحساب تحتاجه لما تبي تنشر إعلان أو طلب، أو تتواصل مع بائع، أو تسوي تنبيه، أو تقيّم بائع.

بعد التسجيل يوصلك إيميل فيه رابط تفعيل. تضغطه وبعدين تضغط «تأكيد التفعيل»، ويصير حسابك جاهز للنشر.
إذا ما وصلك الإيميل، شيك على مجلد السبام، أو اطلب إرساله مرة ثانية من الشريط اللي يطلع فوق الصفحة.

رابط التفعيل ينتهي بعد 48 ساعة، والحساب اللي ما يتفعل خلال 7 أيام ينحذف تلقائياً.
هذا يقلل الحسابات الوهمية.

تقدر تكتب اسمك الظاهر بالعربي وقت التسجيل أو بعدين من الإعدادات،
وهو اللي يشوفه الناس على إعلاناتك. انتبه إنه ينحفظ مرة وحدة وما يتغير بعدها.
واسم المستخدم يبقى بالإنجليزي للدخول بس.
وتقدر تكتب «نبذة عنك» من الإعدادات، تطلع في صفحتك تحت اسمك،
مثل «هاوي سماعات من الرياض». النبذة بحد أقصى 300 حرف، وما تقبل روابط أو أرقام تواصل.

السوق كامل متاح بالعربي والإنجليزي، وتغير اللغة من الزر اللي في أعلى الصفحة.

كيف تنشر إعلان بيع

اضغط «أضف إعلان»، وعبّي النموذج. الخانات اللي عليها نجمة حمراء لازم تتعبى، والباقي اختياري.

أهم الخانات:

• الفئة والعنوان وحالة المنتج.
• السعر، وتحته خيار «هل السعر قابل للتفاوض؟».
• الدولة والمدينة، وهل تشحن أو تسلّم يد بس.
• «طريقة التواصل»: «واتساب برقمي» أو «تلجرام» باسم المستخدم حقك. رقم الجوال مطلوب في الحالتين، ومع تلجرام ما يظهر لأحد.
• «سبب البيع»، خانة اختيارية قصيرة تريح المشتري.

وصف الإعلان: فيه زر «قالب جاهز» يحط لك عناوين جاهزة: الحالة، الملحقات، تاريخ ومكان الشراء، الضمان، التعديلات، العيوب. تعبي اللي يخصك،
والعناوين الفاضية ما تظهر في الإعلان. الوصف لازم يكون 80 حرف على الأقل، والعداد يوريك كم باقي.

الصور:
ترفع 3 صور على الأقل ولو تبغى زيادة تقدر ترفع إلى 10.
وحدة من الصور على الأقل لازم تكون صورة إثبات: المنتج وجنبه ورقة مكتوب فيها اسمك وتاريخ اليوم، وفي النموذج مثال يوضحها. هذي تثبت إن المنتج عندك فعلاً ومو صورة من النت.
الصور تنضغط تلقائياً وينحط عليها شعار السوق المائي عشان ما تنسخ لإعلانات ثانية.

آخر شي تأشر على التعهد: «أتعهد إن المنتج ملكي وموجود عندي، وإن الوصف والصور تطابق حالته الحقيقية.»

المراجعة قبل النشر

إعلانك ما يطلع مباشرة. أراجعه بنفسي، ويوصلك إيميل أول ما ينشر. ولا تشيل هم، ما راح يطول بإذن الله، سويت طريقة تسرّع العملية وينزل بأقصر وقت ممكن.

إذا انرفض، يرجع لك في «إعلاناتي» ومعه سبب الرفض مكتوب.
عندك 7 أيام تعدله وترجع ترسله، ويوصلك إيميل تذكير قبل نهايتها بيومين. إذا ما تعدّل خلال 7 أيام ينحذف نهائياً.
أشهر أسباب الرفض: صورة الإثبات ناقصة، الصور قليلة أو مو واضحة، أو الوصف ناقص.

مدة الإعلان والتجديد

الإعلان المنشور يبقى في السوق 30 يوم. قبل ما ينتهي بـ 3 أيام يوصلك إيميل تذكير، ويطلع لك في «إعلاناتي» زر «تجديد الإعلان». إذا ضغطته تنضاف 30 يوم فوق الأيام الباقية، ويبقى إعلانك منشور بدون مراجعة. وإذا انتهى الإعلان قبل ما تجدده، يوصلك إيميل، وتقدر تجدده من «إعلاناتي» بزر «تجديد»، ويرجع للمراجعة قبل ما ينشر من جديد.

التصفح وصفحة الإعلان

في الصفحة الرئيسية تبويبين: «معروض للبيع» و«مطلوب للشراء». تقدر تفلتر حسب الفئة والسعر والمكان، وتبحث باسم المنتج أو باسم البائع. وتختار عرض القائمة أو الشبكة حسب اللي يريحك.

المنتج اللي انباع يظهر عليه ختم «تم البيع» وينزل آخر القائمة، عشان ما تضيع وقتك على منتج تم بيعه بالفعل.

صفحة الإعلان

• السعر بالأرقام وتحته مكتوب بالحروف، ومعه علامة إذا كان قابل للتفاوض.
• الحالة والمدينة والشحن تحت السعر وزر التواصل.
• الصور تفتح بحجمها الكامل لما تضغط عليها، عشان تشوف التفاصيل بأوضح شكل ممكن.
• زر «تواصل مع البائع على الواتساب»، وتحته «اعرض الرقم». وإذا البائع اختار تلجرام، يطلع لك زر «تواصل مع البائع على تلجرام» بداله. تحتاج تسجل دخول عشان تستخدمهم، وهذا يحمي البائعين من الإزعاج والرسائل العشوائية.
• بيانات البائع: من متى عضو، وكم صفقة مكتملة عنده، ورابط لصفحته.
• أزرار مشاركة ورابط قصير مثل market.iem-world.com/123 ترسله لأي أحد.
• إعلانات مشابهة آخر الصفحة.

مطلوب للشراء: اطلب أي منتج خاص بالصوتيات تبحث عنه

إذا تدور سماعة أو جهاز معين وما لقيته معروض،
اضغط «أضف طلب» واكتب اللي تبيه.
اللي عنده المنتج يضغط «عندي المنتج» وتوصلك رسالة منه على الواتساب أو تلجرام، حسب اللي تختاره، فيها رابط طلبك.

في الطلب تحدد:

• اسم المنتج والقسم، وملاحظة وصورة إذا تبي.
• الميزانية: مبلغ محدد، أو من وإلى.
• حالة المنتج اللي تقبلها، وتقدر تختار أكثر من وحدة.
• الدولة وهل تقبل الشحن أو تسليم يد بيد بس.
• «طريقة التواصل»: واتساب برقمك، أو تلجرام باسم المستخدم حقك.

رقمك ما يظهر مكتوب في الصفحة، الزر يودي للواتساب أو تلجرام مباشرة.

كل طلب يبقى 30 يوم، وتقدر تجدده. قبل نهايته بـ 3 أيام يوصلك إيميل فيه زر التجديد، ويطلع لك زر «جدد» في «طلباتي»، وتنضاف 30 يوم فوق الأيام الباقية.
الحد الأعلى 3 طلبات مفتوحة لكل عضو. وإذا حصلت اللي تدوره اضغط «لقيتها» من «طلباتي».

الطلبات خاصة بمنتجات الصوتيات بس. تضغط «إرسال الطلب للمراجعة»، ويمر طلبك على مراجعة مثل الإعلانات.

لما ينزل إعلان يناسب طلبك

عشان ما يفوتك شي: أول ما ينشر إعلان بيع يطابق المنتج اللي في طلبك، يوصلك إيميل «نزل إعلان يناسب طلبك» فيه السعر ورابط الإعلان.

والبائع يشوف في صفحة إعلانه ملاحظة «فيه عضو يدور على هذا المنتج» ومعها رابط طلبك وميزانيتك. هذي تظهر له هو بس، وما يشوفها غيره.

المطابقة تكون باسم المنتج أو رقم الموديل في عنوان الإعلان، مثل HD600. عشان كذا اكتب اسم الموديل واضح في طلبك.

التنبيهات والمفضلة: خلّ السوق يبلغك

فيه نوعين تنبيهات منفصلين: واحد للمشتري وواحد للبائع.
من كل نوع يقدر يكون عندك لين 5 تنبيهات، وتشوفها كلها وتحذفها من «تنبيهاتي».
وكل إيميل تنبيه فيه رابط تلغي منه التنبيه، حتى لو ما سجلت دخول.

نبهني إذا نزل إعلان

هذا للمشتري. اكتب كلمة بحث مثل اسم الموديل، وإذا تبي حدد التصنيف وأعلى سعر.
أول ما ينشر إعلان يناسبك يوصلك إيميل فيه رابطه، عشان ما تفوتك الفرصة. المربع تلقاه في صفحة السوق تحت الفلاتر.

نبهني إذا أحد طلب منتج

هذا للبائع. إذا عندك منتجات تبي تبيعها، اختر التصنيف أو اكتب اسم الموديل، وإذا تبي حدد أقل ميزانية.
أول ما ينشر طلب في «مطلوب للشراء» يناسبك يوصلك إيميل، وتقدر تتواصل مع صاحبه مباشرة. المربع تلقاه جنب الطلبات في تبويب «مطلوب للشراء».

المفضلة و«نزل السعر»

اضغط القلب على أي إعلان وينحفظ عندك في «المفضلة». إذا البائع نزّل السعر يوصلك إيميل بالسعر الجديد.

وفي السوق نفسه يطلع على الإعلان علامة «نزل السعر» وجنبها السعر القديم مشطوب، لمدة 7 أيام. البائع هو اللي يقرر يظهرها ويرسل الإيميل أو لا، لأن أحياناً التعديل مجرد تصحيح غلط في الرقم.

من المدونة للسوق

بعض مقالات المدونة في آخرها مربع «موجود في السوق». إذا قريت مراجعتي لسماعة وفيه أحد عارضها للبيع، تشوف إعلانه مباشرة تحت المقال. وإذا ما فيه أحد، تقدر تسوي تنبيه من نفس المربع.

إدارة إعلاناتك والصفقات والتقييم

كل شي يخصك تلقاه في قائمة حسابك: إعلاناتي، طلباتي، المفضلة، تنبيهاتي، صفقاتي، والإعدادات. لو فيه صفقة تنتظر تأكيدك تطلع لك نقطة حمراء جنب اسمك.

التعديل والإيقاف والحذف

من «إعلاناتي» تقدر تعدل أي إعلان. وإذا تبي تشيله فترة اضغط «إخفاء» في «إعلاناتي»، أو «إيقاف مؤقت» من صفحة التعديل، يختفي من السوق وترجعه متى ما بغيت بـ«إظهار الإعلان». الحذف نهائي وما يرجع.

لما تبيع: «تم البيع»

إذا بعت، لا تحذف الإعلان.
افتح التعديل وأشّر على «تم البيع» في مربع «بعد البيع»، واكتب اسم المشتري إذا كان عضو. أول ما تكتب 3 حروف تطلع لك اقتراحات بالأسماء.

الإعلان يبقى في السوق على طول وعليه ختم «تم البيع»، ودايم يكون بعد الإعلانات المتاحة. ما يظهر فيه رقمك ولا زر التواصل، عشان ما يجيك أحد يسأل عن شي انباع، ويبقى بعد في صفحتك بختم البيع.

وتنحسب لك الصفقة بعد ما يؤكدها المشتري.

تأكيد الصفقة والتقييم

المشتري يلقى في «صفقاتي» سؤال: «اشتريت هذا المنتج من هذا البائع؟». يضغط «تأكيد الصفقة» أو «ما اشتريت منه». عنده 14 يوم يرد،
وإذا ما رد خلالها ينتهي الطلب، والبائع يقدر يرسله له مرة ثانية.

بعد التأكيد تنحسب صفقة مكتملة للبائع وللمشتري، وتطلع النجوم في نفس البطاقة ويقيّم المشتري البائع. والبائع بعد يقيّم المشتري من «صفقاتي». واللي ينسى يقيّم من الطرفين يوصله إيميل تذكير بعد 3 أيام.

التقييم ما يظهر على طول: يبقى مخفي لين يقيّم الطرف الثاني نفس الصفقة، أو تمر 14 يوم. كذا ما أحد يقيّم وهو شايف تقييم الثاني له، ويكون التقييم عادل للطرفين.

التقييم من نجمة لين 3 نجوم لازم معه سبب مكتوب، 15 حرف على الأقل، عشان التقييم يفيد البائع واللي بعده.

والتقييم بنجمة أو نجمتين ما ينشر مباشرة. يوصلني أول وأراجعه بنفسي، وأتواصل مع البائع والمشتري الاثنين عشان أفهم وش صار.
السبب إن التقييم المنخفض يأثر على سمعة البائع، فما نبيه ينظلم بتقييم غلط أو كيدي، وبنفس الوقت ما نبي المشتري ينظلم ويضيع حقه.
وخلال المراجعة يشوف اللي قيّم جنب تقييمه «تقييمك قيد المراجعة».

الصفقات المكتملة والتقييمات تظهر في صفحة البائع، وتقدر تشوفها قبل ما تتواصل معه.

وحتى المشتري له صفحة: أول ما يضغط زر التواصل أو تنأكد له صفقة، تنسوى له صفحة تلقائياً لو ما عنده. والرسالة الجاهزة اللي تروح للبائع آخرها «ملفي في السوق» ورابط صفحته، عشان البائع يشوف صفقاته و«تقييمات البائعين له».

الإعلانات المميزة

في أعلى السوق 4 خانات للإعلانات المميزة، تظهر بصورة كبيرة وعليها العنوان والسعر. التمييز خدمة مدفوعة، ونشر الإعلان العادي يبقى مجاني.

الطريقة: من «إعلاناتي» اضغط «⭐ ميّز إعلانك» تحت الإعلان اللي تبيه،
والزر يطلع للإعلانات المنشورة بس. تختار المدة: أسبوع، أسبوعين، 3 أسابيع، شهر، أو شهرين. ترسل الطلب،
وبعدها تدفع من متجر عالم السماعات.

وإذا فيه خانة فاضية أعلى السوق، يطلع فيها زر «أعلن معنا» ويوديك لنفس الطلب. أما إذا الخانات الأربع مليانة، الصفحة تقولك تقريباً متى تفضى أقرب خانة. توافق على الموعد، وطلبك ياخذ دوره ويبدأ تمييز إعلانك من ذاك اليوم.

الأمان: وش سوينا ووش عليك

اللي سويناه من جهتنا:

• كل إعلان وطلب ينراجع قبل النشر.
• صورة الإثبات والتعهد إلزامية مع كل إعلان.
• النشر ما يصير إلا بعد تفعيل الإيميل.
• التقييم ما يصير إلا بعد صفقة مكتملة.
• زر «بلّغ عن الإعلان» في كل صفحة إعلان.

واللي عليك:

• لا تحوّل أي مبلغ قبل ما تتأكد إن المنتج عند البائع فعلاً، مثلاً بمكالمة فيديو.
• شوف صفقات البائع وتقييماته في صفحته قبل ما تتفق معه.
• التسليم يد أفضل إذا كنتم في نفس المدينة، وجرّب المنتج قبل ما تدفع.

وللتفاصيل اقرأ صفحة نصائح الشراء الآمن قبل أي تحويل. البيع يتم بينك وبين الطرف الثاني مباشرة، وعالم السماعات منصة إعلانات ومو طرف في البيع ولا الدفع ولا الشحن.

شفت خلل أو عندك فكرة؟

في أسفل كل صفحة زر «ملاحظة أو اقتراح». تختار إذا كان خلل أو اقتراح، تكتب وترفق صورة إذا تبي، وتوصلني مباشرة. أقرأ كل ملاحظة بنفسي.

ابدأ الحين

عندك سماعة أو جهاز ما تستخدمه؟ اعرضه. تدور شي معين؟ اطلبه وخلّ اللي عنده يجيك.

موجود في السوق

ما فيه إعلان معروض لهذا المنتج الحين.

نبهني إذا نزل